Qirîya waştîya îrlandayijî

Mi vatêne qey meseleya Îrlandayijî qedîyaya. La çend rojî verî embaz Zerrweş Xodîyî mi rê meîlêk şawit û tede wina îdîa kerd ke Îrlandayij ney waştîya ey a belengaze blogê mi wanena û maîlo ke nameyê Îrlandayijî ser o nusîyayo zî na waştîye nuşto.

Mi bi meraqî nuşte wend. A raşte na îdîa kewte sereyê mi. Beno ke Îrlandayijê ma ê welatê xerîbî de zerrîyêke nêmcet verdaya û aya ke ma eşnawita qirîya na zerrîye bîya. Hinî Homa zaneno! Wendoxê delalî! Ez texmîn û hîsanê şima zî meraq kena. Şima eşkenê binê nuşteyî de şiroveyanê xo pare bikerê yan zî sadeagonn@gmail.com rê maîlê xo bişawê!

 Goreyê munitişê embaz Zerrweşî, weşanîyayîşê nuşteyê îrlandayijî ra dima serebût wina qewimîyayo:

‘’Serê sibayî a cayê xo ra werişte û şîye serê selebî, sereyê xo şût. Bi bornozê xo yê rengê qehweyî leşê xo kerd ziwa. Dalpeyê peyênî leşê aye tewaf kerd û ame resa serê peynîya linga aye. Aye awa leşê xo neqlê potê bornoze kerde û bornoze serê leşê xo ra şeqetnaye. Hêdî hêdî cilê xo ra kerdî. Şîye verê eynîkê selebî û makyajê xo kerd. Makyajî ra dima ameye eywana keyeyê xo.

Şibaka eywana keyeyê xo ra ewnîyaye Qadê Yewşemeyê Gonînî ra. Qadê Yewşemeyê Gonîne de hema zî boya gonîye bîyayêne vila. Merdimê ke nê qadî ra vîyarenî çimanê xo de hezar hesiran hewênenî. La hesirê çimanê înan depoyê çimanê înan de bîyê boydayî û mendê. Beno ke kes hayrê nê depoyê çiman de zî nîyo. La şipaka eywana aye ra her çî sey eynî, eşkera aseno.

Temaşeyê nê qadî meîlê vizêrînî ardî vîrê aye. Vizêr a reyna dekewtebî blogî û nuşteyê Îrlandayijî wendibî. Hesîrê depoyê îrlandayijan çimanê aye ra herekîyabî, sey çemê sarume dar û ber kerdibi verê xo û herekîyabî.

Meîlê xo akerd û nuştoxa blogerî rê meîlêk nuşt. Nê meîlî de aye nêwaşt ke behsê xo bikera. Aye bêîrade meîlê xo de behsê waştîyê xo kerd.

Waştîyê aye welatê nuştoxa blogerî ra bi, muhendîs bi. Seba karî welatê xo ra amebi Îrlanda. Înan yewbînî nêzdîyê Qadê Yewşemeyê Gonînî de yew kafe de dîbî. Embazêke ê dabî şinasnayîş. O çax a hema wendekar bîye, embazê xo rê nîyetê xo yê bîyayîşê xebatkarê TîkTokî akerdibî. Embazî zî a bin ê muhendîsî der dabî şinasnayişî. A rojî çimanê muhendîsî de depoya çiman kifş kerdibî. La dîyarbi ke muhendîs merdimêko eşkeno bi hîsanê xo bi. Depoya çimanê ci binê çimanê ci krec girewtbi. Awa depoya çimanê ey hêdî hêdî bîyîne buhur û perayîne , qedîyayîne.

Gelo, senî beno? Vatibi ke no merdim bi giranîya depoyê çimanê xo senî eşkeno. La şîyayîş û ameyîşê înan de sebebê na hebe ferq kerdibi. Dimayê nê ferqî ra bê îrade mabenê înan hêdî hêdî bi weş, rojanê ewilînan de hewteyêk de rojêk yewbînî dîyêne la dima hewte ra çar nêbi panç rojî ameyêne têhet. Nê têhetameyîşan de a hêdî hêdî welatê ey, ziwanê ey û hîsanê ey musabî.

Çend wextan ra dima yew qabîlîyetê xo yo newe ferq kerdibî. Hetê musayîşê ziwanî de qabîlîyetê aye bibi. A ziwanê muhendîsî vera vera musaye, her ke şi aye muhendîsî de bi ziwanê ey de qisey kerdêne. Derheqê muhendîsî de aye zanayîşê xo zêdênayêne û o fam kerdêne. Nê qebul û cehdê musayîşê ziwanê muhendîsî ra muhendîs bibi nerm, hîsê ey ê nimiteyî welatêkê xerîb û bêxemî de vecîyabî meydan. Krecê depoyê ci helîyabi. Awa depoyê ci ge-ge serê rîyê çimanê ci hît kerdêne. Wina bibi ke muhendîsî zî verê aye de qîmetê ziwanê xo dahîna weş fam kerd û qabîlîyetê ziwanê xo aver berd. Hendê bibi ke ey qerarê xo yo peyên sey çîyêkê pîrozî aye re kerdibi eşkera. Ey dest pê kerdibi ke kitabê Faulknerî biaçarno ziwanê xo.

Gama nuştoxa blogerî ewnîyayîşê aye yê blogî kişf kerdibî û nê ferqkerdişê xo serê blogê xo de nuştibî, a mahcub bîye û seke waştîyê aye bo verpersê blogere dabi.

Nika zî reyna hêvîya muhendîsî bîye, boyanê xeyalanê homayan kena rengîn sawena leşê xo, eynikê selebî ra reya peyêne ewnîyaye xo ra û keyeyî ra vecîyaye. Nika verê Qada Yewşemeyê Gonînî ra ver bi kafe şina. Vengê kulmanê pehnîya kundereyanê aye hesîrê depoyê çimanê aye nimitêne…’’