Mottoyê Çewlîgî: Xwi r' bizewij'
Xora dadîya mi ya ke mîyanê keyeyê xo û keyeyê babîyê min ê upper-feodalî de rojêke zî destek nêdîyo, na mesele de meşaleh yew fekî ra her kes sey aye vano: ''Xwi r' bizewij'.'' Apo ke her roje persa cinîyan keno, xala ke mêrdeyê xo ra rojêke zî xeyr nêdîyo, pîrika (rehmetîye) ke fek û pirnikanê pîrikê min ê şefqîyî ra ardo, xalo ke seba ke reelsanê facebookî ra sereyê xo berz nêkeno rîyê cinîya xo vîr a kerdo, babîyo ke qetî kerdenê cinîya xo nêwesifnayê, amika ke ci rê tutî nêbîyê, naja ke semedê solê nanî zî paskilî werdê, dezayo ke bi zorê dadî û babîyî zewijîyayo, xalzayo ke her roje lomeyê zewajî keno ûsn.
Mi zî yewver nînan rê pers kerd ke gelo ê zewijîyayê se bîyo. Nînan (amika mi ra ber) zî yewver mi rê heman cewab da: ''Ma rê tutî bîyî.''
Ecêb o ke merdimê ke pê zewajê xo qayîl nîyê her roje zor dana to ke bizewije. Dadî û babîyê mi tersenê ke eke ê bimirê (ke emrê Homayî yo, qetî yo) ez tik û tena bimana. Hesreta mi bi zewajî çin a. Meraqê mi bi qijan çin o. Qijîya xo ra nata zî ez qetî tenatîye ra aciz nêbîya. Heta mi na cuya xo de se kerdo seba ke bineyna tena bimana kerd.
Qijîya xo de mi vatêne qey heta ke ez biresa hîrisanê xo bizewija û tûtan bîyara. La heyatî suprîzê bêwextî û bêtelehî kerdî. Mi hema vîstanê xo de pê edebîyatî sereyê xo yo delal kerd têmîyan, pê derdan bedenê xo yo zixm kerd birîndar û pê nêmcetîyan zerrîya xo ya recifîyaye şikite.
Pîrikê min o rehmetî (babîyê babîyê mi) tim persayêne vatêne ''To xo rê yew lajê kutikî hema nêdîyo?'' Mi zî vatêne ''Camêrdêkê sey to ez ça ra bivîna bigêra binê mareyê xo?''
La emr bîyo hîris û yew. Goşanê mi de teyna deyîra ke pîrika min a rehmetîye (dadîya babîyê mi) tim vatêne est a. ''De mi r' vaj'.''
Her çiqas ''derd û kulê lajan zewaj o'', ''zewajo bêzerrî'' nêeşkeno ma pê qala tutan bixapîno. Semedo ke şima rê tutî bibê mezewijê embazênê, hele hele çirey pê qiseyê çewlîgijan têmegêrê. Çunke hema xeyrê çewlîgijan xo rê çin o. Caverdê.
Yorumlar
Yorum Gönder