Hewnê Mîyanê Hewnî

 Hewnê serranê vîstan nênê vîrê mi. O çax zî nêameyêne vîrê mi.

Serranê hîrisan de bi ardimê lustralî hem hewnî zêdîyayî hem zî vîrî ra nêşîyî.

Ez kerametê hewnanê xo û hewnanê embazê xo Ş.yî meraq kena. La ne ez Hz. Yusuf a, ne zî xelaskerêkê mi est o ke zereyê bîrê zereyê mi ra mi bixelisno.

Mi hewnanê embazê xo Ş.yî de zaf kerametî dîyî. La ey zî goş nêda qiseyanê mi, vat ke o şikîyayo. Wa bişikîyo. Seba ke merdim weş bibo ganî hêverî birîndar bibo.

Mi ey rê vat ke aya ke ez wazena tim bêra hewnê mi qetî nêna. Vat ke eke ez mewaza a do bêra. Ey zî ez şiknaya. 

La mi a delalîya xo peynî de hewnê xo dîye. Ez bermaya, aye rê hêrs bîya ke çira qetî nêna hewnê mi.

Serê erdê salone de dergkerde bîye. Rîyê aye de huyayîşêk, çimê ci akerde yê. La a qisey nêkena, cewab nêdana mi.

Mi bi pêro hêzê xo xîret kerd ke ez erdî ra aye wedara û rind verarê xo bikera. Ez kewta binê çenganê ci. La bedenê aye giran bîyo, ez bi sereyê xo nêeşkaye.

Wird delalê delalîya mi kişta ma ra şîyêne û ameyêne. Mi înan ra ardim waşt. La seke înan zî ez nêeşnawitêne. Ê ne ewnîyayêne ma ra, ne zî veng şîyêne goşanê înan.

Mi dî ke çare çin a, ez hinî kişta ci de ronişta. Mi lew ma alişkananê cemedîyayeyan, destê cemedîyayî kerdî mîyanê lapanê xo. Ez vergêraya ci ke wa a tim bêra hewnanê mi.

La nişka ra hewn qedîya, mi çimê xo yê hîtî odaya xo ya tarîye de akerdî.

Saete 03.46 bîya.