Kafeyê Çewlîgî

Komputure binçengê mi de ez kafeyanê Çewlîgî de xebitîyena. Nê kafeyî qata tewr corêne ya bananê berzan ra yê. Sey ''Cê Ma'' tayê nînan dekewtişê bîna de yê la îzolekerde yê.

Kafeyê Çewlîgî seba pêvînayîşê waştîyan virazîyayê. Her masa de waştîyê biqesawetî est ê. Ez hetêkî ra engiştanê xo klavyeya komputure ser o bena û ana, hetê bînî ra goş nana nê waştîyanê şermokan ser.

Keynayî û lajî têkişt de nîyê. Keynayî peyê xo danê qerebalixê kafe, lajî verba nînan de yê. Destê tenik û nazikî nêresenê yewbînan. Nat û wetî ra qisey kenê la wexto ke qise yeno heskerdişî ser vengî zî benê tenik. 

Fertarî waştîyê belengazî çimanê xo bi leze der û dorî ra çarnenê. Şinasî çin o. Vengê tenikî birîyenê. Keyna peçeteyêke dergê lajî kena. Destî bineyke resenê pê la ca de abirîyenê. Lewî kîşte ra huyenê. 

Keynaya ke fistanêko sûr dayo xo ra û lajo ke çimê ci kesk ê bala mi ancenê. Ge bi tirkî qisey kenê ge zî bi kurmanckî. Ez fam kena ke nê waştîyî Kanîreşî ra yê û dewij ê. 

Keyna seba ke bêra merkezî keyeyî rê vato ke a do şora nêweşxaneyî. La gereka a bi leze şora; çunke birayo ke merkez de xebitîyeno, do şoro verê nêweşxaneyî. Wextê waştîyan ancax hîrê-çar çayan rê vejîyeno. 

Lajo çimkesk wazeno  keyna biremno. La keynaya fistansûre ne vana heya ne zî vana ney. Keyna sereyê xo nana xo ver, ewnîyena fistanê xo yê sûrî ra. Lajek zî wextêkî ra pey mejbûr maneno ke bêveng bimano. Waştîyî bêveng wurzenê we, keyna verê kafeyî ra vejîyena, lajek şino verê kasa û o zî berê kafeyî ra vejîyeno teber. 

Beno ke waştîyî pîya niştê asansorê qata desine. Beno ke keyna uca de lajekî rê vato heya. Beno ke destî resayê pê.

Ez agêrena ekranê komputura xo ser. La pê hesîyena ke çimê her kesî zî mi ser o yê. Nê kafeyanê nimiteyan de tena ez tikûtena ronişena.