Îrlandayij

Nuştox Albert Camusî reyêke vato; ''Nuştoxî seba ke bêrê wendene nusenê. Ê nuştoxê ke eksê ney îdîa kenê nînan rê hurmet bikerê la bawer mekerê.''

Ez zî her roje ewnîyena îstatîstîkanê blogê xo ra. Hela ewro hetê kamî ra, kamca ra, çendê reyî, nuşteyê blogê mi ameyê wendene. Şarê ma yo belengaz teda û zorbazîye ra vilayê her hetê dinya bîyo. Coka Amerîka ra bigêre heta Asyaya Mîyanêne zafê welatan ra ''wendox''ê mi est ê. 

La mîyanê îstatîstîkanê welatan de tim welatêkî bala mi anceno; Îrlanda. Îrlanda ra hema hema her roje çim erzîyeno blogê mi. 

Îrlanda. Seke ez zanena Îrlanda de dost, embaz, nas û merdimê ma çin ê. 

Meraq mi weno. Gelo nê (yan zî na yan zî no) kam ê ke tim blogê mi teqîb kenê? 

Eke merdim eciz bibo eşkeno her çî bikero. Ez zî wina meraqê xo ra eciz bîya. Coka mi xo bi xo profîlêk aferna. Hinî goreyê mi no yew camêrdo 65-70 serrî yo. Camêrdo îrlandayij serranê 80an de sebebanê sîyasîyan ra neçare mendo ke welatê ma yê bimbarekî biterikno û koç bikero. 20 serran nata zî o Îrlanda de, Dublin de maneno. 

Camêrdo îrlandayij nêeşkeno abigêro welat. Welat de hema zî dewlete gêrena ey. Cara Îrlanda de xerîb o la nika welatê ey zî ci rê bîyo xerîb. 

Her şan o robdoşambrê xo dano xo ra, verçimikanê xo gêno û verê komputere de nişeno ro. ladyzazarus.blogspot.com. Enter. Ewro zî nuşteyêko newe çin o. Nuşteyêkî newe ra waneno. Ecizîyeno.

Wurzeno we. Şino verê pancera. Ewnîyeno kuçeyî ra. Nişka ra hesreta welatî ra zerrîye teng bena. Nişka ra o keweno mîyanê cilan. Hêdî hêdî ê rojanê welatî yê neqîşnayeyan ano vîrê xo.

Ez tîya ra venga  îrlandayijî dana ke hayîya mi bi to est a. Mi rê derd û kulê xo yew bi yew binuse: sadeagonn@gmail.com

Zaf selamî.