Cewabê îrlandayijî

Nuşteyê mi ''Îrlandayij''î ra pey zafê kesan emaîlî ser ra xo resna mi. La ez bi nînan kewta şik. Mi nê îrlandayijê sexteyî test kerdî. Tayê nînan xo ca de eşkera kerd. Tayênan bineyk zor da mi. Axir, mi fam kerd ke nînan ra yew zî îrlandayijê mi nîyo.

Mi vat ke îrlandayij nêwazeno xo eşkera bikero. La ewro serê sibayî emaîlê ci resa mi. Mi bi heyecanî mesajê ey wend. Ez bi destûrê ey cêrî ra mesajê ey nusena:

''Embaza delale, 

Îrlandayîjo ke ti gêrena ci ez bi xo ya. La resmo ke to nuşteyê xo de xêz kerdo ez nîya. Ez ne kesêko surgunkerde ya ne zî kesêko belengaz a. Ez Îrlande de, sey muhendîsêkî şîrketa Tik-Tokî de, serekîya yew qismî de xebitîyena. Emrê mi zî hema 37 o. Ti zanena Eimear Noone embaza min a nêzdî ya. Ma hema vizêr şan pîya bîyî. La to nuşteyê xo de çîyê raştî zî nuştê; ez her roje ewnîyena blogê to ra û çi wext nuşteyêko newe bêro ez ca de wanena. Ez zî ge ge bi zazakî nusena. Ez ha kitabêkê Faulknerî açarnena zazakî ser. Ez kesêko depresîf zî nîya. Ez cuye ra, gêrayîş, wendiş û kêfkerdişî ra hes kena. Ez nê çîyan qey to rê nusena? Mi dî ke to nuşteyê xo de qalê kurdêkê belengazî kena. Ma sey kurdan vanê qey cuya ma dej û birînan ra yena pê. Ma tim çarenusêkê xirabî û bêtelehî xo rê heq vînenê. Ma çîyanê rindan û biqîmetan xo rê heram hesibnenê. Ti vanê qey ancax ê kesê ke sey îrlandayijê to yê, seba ke travmayanê xo weş bikerê nêzdîyê ziwanî benê û nuşteyanê to wanenê. La wina nîyo. Ez sey muhendîsêkê serkewteyî ziwanê xo de eleqedar bena. Nuşteyê to sey nuşteyanê rojnameyan weş û rindek yenê wendene. Ez hêvî kena ke wendoxê to do bizêdîyê. 

To rê zaf selam kena.''

Nê emaîlî ra pey ma hîrê-çar emaîlê bînî yewbînan rê şawitî, ma qisey kerd û derdê xo kerdî şenik. Şîretê îrlandayijî zî sere û çimanê mi ser o.